ناکامه ژوند:شکرالله طاهري
ددې ناکامې ژوند درد ناکو افسانو ته ګوره
راځه د زهرونه زمونږ ډکو پیمانو ته ګوره
دآزادی دشمعې ډیربه وي هرخوا عاشقان
په دې رڼا به سوځوي ځانونه ډیر پتنګان
جنون مرګ شوق آ تش د پروانو ته ګوره
راځه دزهرونه زمونږ ډکو پیمانو ته ګوره
مونږ وچې شونډې تږې ناست یود قطرې په تمه
د زړه توټې خرڅوي خلک یو لقمې په تمه
زمونږ په وینو ته ډک شوی خم خانو ته ګوره
راځه دزهرونه زمونږ ډکو پیمانو ته ګوره
مونږجنګوي دخپل نفاق او دنفرت په دانو
فرقه فرقه مو بیلوي بیا د ښه ژوند په نغمو
ته دصیاد چل او فریب دې ترانو ته ګوره
راځه دزهرونه زمونږ ډکو پیمانو ته ګوره
تادوحشت دا ورځې شپې راته ډالی راکړی
دا د اتل لقب تا خپله په سیالی راکړی
لږ ته دې خپل دیارانې تیر زمانو ته ګوره
راځه دزهرونه زمونږ ډکو پیمانو ته ګوره
کم عقل ندی دا صیاد چې مفت دانې را کوي
اوس په خیرات بې مطلب څوک اعانې راکوي
زیرک مرغیه د دانو لاندې دانو ته ګوره
راځه دزهرونه زمونږ ډکو پیمانو ته ګوره
شکرالله طاهري
